Search


Jan 27, 2021

Biehla


December 20, 2020 khan Delhi tlangah Sinlung Academy of Letters (SAL) hminga buotsai le sut, phek 400 dong (Hmar 200, English 200), a hming BIETHU ti chuh tlangzar a ni a. Kum tin literechar tling lekhabu pakhat bek insuo tum hi SAL tumtar (target) a ni leiin BIETHU-2 a ding khom lak khawm tran nghal dinga ti a nih. Chu prawzek le a ruola buotsai dinga lungrila phan chu BIEHLA a nih.

LENRUOL HLA BU (1979) sut hnina kha 2005 a mi daih a ni tah. Kha taka hla inchuonhai khah thrang hni zet liem ta hmaa phuok, thralai a tam lem pieng hmaa mi an ni tah. Kha taka khan hnam hla, hla lenglawng le sai hla 233 le pipu hla 7, hlado 17 le naupang inhnelna hla 25 hlu lut a nih. LHB sut hma le hnunga hla tam tak, lekhabua la hlu lut lo a um. Chuong hla hlui le thar, a tlawm takah 500 chuong vel ni dinga ring chuh chim hmanga an um hma ngeia a bu-a hlu lut hi mi tin liengkoa innghat, tha bat tlak ding ei hmaa innghat chu a nih. Thim le var la hre fie lo, triel ruoia hringnun thlirtuhai dodalna leia ei sawsaiti, pasie mongtol le hnuchâk invoi anga a thrung inbiel hun hi a sawt ta a, har suok a, tho inkang a hun tah. Solomon HLAHAI HLA dam hi Baibula a um sung chun, ei biehlahai khom hin ei sawsaiti-ah hmun an chang ding a nih.

Hla porche hrim hrim a um. Hla porchea ngai thei a tam zuol. Van ram amanih Kanan Ram Thar ngaina hla ringot lu le mong khom hre chang loa inbukpui, takram nunah Pathien ram hlimthla le thutak hlek hmu ding um lo, thilthawin a zui lo ringna thuom lem inbel pawl, insuk-ramthar le thlarau mi vieu sia insie hi thil hi um thei a nih. Ram thar ngaina le hluo chakna thu le hlahai hi nunghak-tlangvalin inhluo châka an inthuok huom huom leh inang ka ti leiin, ‘Hla hur’ ka ti-fiem hlak a, a ngaimaw tawk khom an bo nawh. A hun le hmun zira hla inlar hi hun le hmun danga chuh hla tirdakum le inzapuium a ni thei. Literechar tling thu le hla ruok chu sir hrang hranga inthoka hringnun thlalak chieng taka hriltu le mi’n entirtu, trongkam thra le inrila thuom mawi an ni tei hlak a, an hlutna a da thei nawh. Chun, ngirhmun pakhat fie tak le mawi taka hrilna chuh bazaar tronga inthuom khom ni sien, thu rangkachak a ni thei. Maimarawl thu le hla a ni pha pha, ieng anga thluk mawiin inthuomtir inla khom, tuipuia ûm ruok nam phum angin sawt naw teah a hung inlang suok el hlak. Chu chu takna pai lo thu le hla hrim hrim chan a ni vong.

English hla phuok thiem Thomas Gray chun, a hla phuok chuoi thei lo “An Elegy Written in a Country Churchyard” a chun,

Full many a gem of purest ray serene,
The dark unfathom'd caves of ocean bear:
Full many a flower is born to blush unseen,
And waste its sweetness on the desert air.
Li ril pûk thim dăi phâk lo chun,
Lunghlu mawi tinthang a kol a;
Par mawi tam tak tû hmu loa vulin,
Thlaler virthli’n an rimtui a lĕn hmang

a lo ti ang khan, eini khawvel chikterek sunga khom hin hla mawi le thra, dai kil kara tu hriet le sak hlaw loa, khawtlang le kohran mitmei vengna leia lo tham ral tah ieng zat top am a um ding maw? Ka tleirawl tran tir laia thu le hla ka phuokhai le sai hla le hla lenglawng kan ziekna zieklobu sa tak tak, kan piengthar inhai laia Pathien thu le inkala an mi lo inchuktir leia kan raw hmanghai inpamumzie dam kha kan hung hriet suok hnung hlak chun tui inbaw hnung rŭt tum ang chauh a ni ta si! Pathien angpuia siem mihriem le mihriem inkara inditna le inhmangaina thu dam suola ngaitu chun Pathien umzie le nina a paw naw hulhuol a ni thei. Hringnun khawl lipui mortu châkna dam hi Pathienin siem naw sien damin umzie nei naw nih. Chu chun Eden a nghor nghing a, mihriem le Pathien inkarah chadan inthuk tak a thlak a, chu chu hruk bit tumin voisun chen hin ei buoi map map a nih. Ei tonhriet ang tawk tawka sir hrang hranga chu ngirhmun hrilna thu le hla man le pom thiem lo mihriem chu mi ngaituoum tak a ni thei. Chuleiin, hla khon khawm sin ei bawzuinaa hin lungril fim tak putin, ei hnam rothil a nih ti hre zingin, ei nei ang ang inro lo le intîm loa thaw khawm dingin ei infiel a nih. International standard quality hawl phaka thraa sut tum a ni bakah hieng hlahai hi boruok zaia digital laibrary-a inhmang thei ta lo dinga sie lut ding a nih.

A hla thu, phuok hun, a thluk (soprano-tonic solfa) le phuok san tawite (footnote-a sie remchang tawk) le contact address (postal address, telephone, mobile, whatssup number, e-mail number) le thil dang trula hriethai chu a hnuoia address-a hin thon ding a nih. Hi hla bu hi a suok ruola mobile apps khom inpei dinga beisei a nih, a bu kol nawhai khomin ieng lai khoma mobile-a inthoka an en thei dingin. Hla thu inlam lo le trongkam hmang dan indik hlel deua hriethai chu editing thaw hunah a phuoktu le editors hai inrawna siem phuisui tum a ni leiin, chu chu thaw thei dinga inhong lohai chun hung thon buoi ngai naw nih. April 2021 chena hmuhai chauh pom ning a tih. Thonna ding chu a hnuoia ang hin a nih:

1. Mr. L. Keivom
C-408 Purvasha, Mayur Vihai-1
Delhi-110091

E-mail: keivom@rediffmail.com
Mobile: 9868213252; Landline 22757630

2. Mr. Lalremlien Neitham
E-mail: lalremlien@gmail.com
Mobile: 7085950737

###

No comments :