A remchang hun taphotah BAIBUL THLUOINA ti thuthruoia hmangin, mi hrang hrangin Baibul chang an hung thur suoka inlet dan le DV-a kan inlet dan enkhina hung ziek ka tum a. Zani khan INRUOLSIEK VS INTLANSIEK ti thupuia hmangin ka ziek a. Voituka ding chun mi pakhat hung thur suok, Gen. 39:9, “hi ina hin keia neka lien lem tukhawm an um naw a: a nuhmei i ni leiin nang bak naw chuh ka ta dingin iengkhawm inro a nei bawk nawh: chuleiin, iengtin am hi suol lientak hi thawin Pathien chungah thil suksuol thei ka ti leh?” (BSI-Hmar,2017) ti, Josefa trongkam hi ka hung thluoi ding a nih.
Ngaituona ril hmang loa ei tiem liem puot chun tluong zuoiin a’n lang. Ei bi chieng ruok chun zawna khir tak tak indon chieng ding a um. Pakhatna, hi châng tawi te sunga hin colon (:) voi hni zet hmang a ni a, a san ie’m ning a ta? Grammar-a Punctuation hmang dan indik inchuktuhai chun colon hmangna ding a um nawzie le comma (,) ringot hmanga zo thei a nizie hre seng an tih. Inlettuhai punctuation hmang dan hi khaw lai grammar sikula inthoka an inchuk dok am ni’ng a ta? Comma le semi-colon hmang dan an hriet naw leia an suk-colon vong el am a ni ding maw? Baibul hi literechar thraa ngai le pom a ni a, a ni nawna ding hmuna punctuation an sie palh leia inchuktirna danglam suok thu khom hril ding a tam.
Pahnina, “suol lientak” ti hi a umzie tak iem ning a ta? ‘Lientak’ ti ziek zom a ni hin grammar dana khaikhinna (comparison) khelah sie a, Pathien nina tawpkhawk hrilnaa ‘tak’ anga a hmang a ni chun theulawzi khik buoi nasa hle’ng a tih. ‘Suol lientak’ ti-a a hril hi NIV chun “such a wicked thing” a ti laiin NRSV/ESV/KJV le standard translation dang danga chun “this great wickedness” ti a ni deuh vong. Hmar trongin ‘wicked’ chu ‘rilo’ tina a na, ‘wickedness’ chu ‘rîtlona’ a nih. ‘Rilo, ritlona’ ti thu mal hi Mizo/Lusei trongah an nei ve tlat naw a, ‘mi suaksual’ ti hih ‘mi rilo’ tina angah an hmang. Hieng po po hi bûk tonin DV-a chun, “Chuong chu a ni leiin, iengtin am hieng ang thil rilo hi thawin, Pathien lakah suol ka thaw ding a na?” ti-a sie a nih.
Pathumna, BSI-in “Pathien chungah thil suksuol thei ka ti leh?” ti-a a hril laia DV-in, “Pathien lakah suol ka thaw ding a na?” ti-a a sie hin umzie inril tak a pai a nih. An umzie khom sim le hmar tluka indanglam a nih. A danglamna chu ‘thil suol thaw’ le ‘thil thaw/suk suol’ inkar a nih. ‘Suol’ ei ti hih theulawzi-a a umzie chu ‘dan bawsietna’ a ni a, Saptrongin “committing sin” an tih. Pathienin thei ra pakhat fa lo dinga thu a pek chu Evi le Adamin an fak lui leiin dan an bawsiet a, ‘suol’ an thaw a nih. Fak lo ding a ni thu hre zinga an ditthlangna hmanga Pathien thupek an bawsiet a ni leiin an thaw amanih suksuol a ni nawh. Thaw suol chu hriet naw lei amanih, chang suol lei amania thil um a ni a, Saptrong chun ‘committing error, mistake, blunder’ an tih. Chun, thil thra lo hrim hrim hi suol (evil) anga ngaina ei nei a, hi hi inzirtirna indik lo a nih. Hieng thil hi Pathien thu mi lo inchuktir hmasatuhai khan an indanglamna hre chieng loa suol thila an mi lo siepek vong leiin, ‘suol’ ei hau taluo a, suol umzie tak, dan bawsiet umzie le a kakhawk nasatzie man fu loa kristien sakhuo hminga pawla intâl buoi ei tam taluo. ‘Thil thaw suol le thil suol thaw’ indanglamna ei hriet naw leiin ‘thil suol thaw’ (committing sin) ti po po ‘thil thaw suol’ tiin an mi lo inletpek vong a, ei chi-ai tran tak tak ding chauh a nih. Hi thil ringot inthiel faina ding hin thrang tam a ngai ding a hoi.
‘Thil thaw suol’ le ‘thil suol thaw’ indanglamna khom hre loa Baibul inlet sin amanih le rongbawlna sina ei pu ve top el dam hi a huoisenthlak khop el. Rongbawltu un tak tak lai khom hin a danglamna hang hril fie ei tum a, a ngaina hre loin an kahâk el a nih. An beram enkolhai lem chun an hriet naw luotin, inchuktirna indik lo inba tum an mi sawn nuom el bok. Ei inhmang dan inthukzie hi iengtin am inhre suok thei ei ta? Ei saruokzie hrein, ei lemchangna kawr hi hlîpin, tlang takin Pathien le ei chengna khawvel hi dawr dan inchûk ei tiu khai.
(Delhi, May 12, 2021 Wednesday).
###
No comments :
Post a Comment