Suong Vs Uong/Chapo

(2 Kor 10-12; Gal 6:14)

Ka u naupa James L.Keivom thil hung indon kha ngaisak hman loin thil dangin a mi chim a. Kum iemani zat liem taa thluoina tawite ka ziek chu ka hmu fuk hlauh a, a hnuoia hin ka hung thur suok. A huntawk ei ti naw leh hung hril inla, hun remchangah a kim thei angin hung ziek tum ka tih. (May 13, 2021 Delhi)

Quote
“Tirko Paula’n ieng nèk khoma kros a ngai poimawzie le hlutzie a hrilnaa ‘suong’ ti ei hmangpek hi Saptrong chun ‘boast’ ti a ni a, chu chu a mal ngawka inlet chun ‘chapo, uong’ tina ni’ng a tih. Hieng thu mal ‘uong, chapo’ tihai hi Grammar dan chun tuortu Object thrang loa hmang thei an ni leiin Intransitive verb an tih. Amiruokchu, ‘uongpui, chapopui’ (boast of) tia ei hmang pha ruok chu ei uongpui le chapopui thil kha hril sa a ngai leiin object thrang sa loa hmang thei an ni nawh. ‘Suong’ (be proud of) ti khom hi transitive verb a ni leiin ei suong thil (object) hril sa loa hmang thei a ni nawh. Entirnan, ‘Lala a uong’ (boast) ka ti thei a, chu chun tuortu (object) ieng khom a ngai nawh. “Lala a suong” ka ti ruok chun mi dangin Lala a suong (to be proud of) thu ka hrilna a ni dai a nih. ‘Lala a’n suong=Lala a + insuong’ ka ti chun ‘insuong’ tia ‘in’ ti tak hi reflexive verb siemtu a ni leiin object (tuortu) ngirhmun a hluo nghal a nih. Paula chun tirko danghai rongbawlna chu a suong hle laiin, ama rongbawlna biel puo tienga mi dang thaw inrimna chu a uongpui nawzie a hrila hin (2 Kor 10:13-15) ‘suong’ le ‘uong’ danglamzie chu a hril chieng hlein ka hriet. Exam-a mi thaw thrat ka suong thei a, ka thaw thra ve chun, chu chu keima thilthaw a ni leiin ka uongpui thei.

“Ei thu chai hi a teknikal êm a, phêk tam ziek thei a ni lai zingin, tiemtu mimir ta dingin nghokum a ni ding ti ka hriet a, ei hril tum takah lut lem ei tih. Baibul chàng ei tar langa ‘suong’ (to be proud of) ti ei hmang hi a’n dik naw a, ‘uongpui’ (to boast of) ti hmang lem ding a nih. Thu kalhmang insiem dan le hmang dan an engto rak naw lei amani ding, BSI le BFW inleta hai hin ‘boast” ti po po deuthaw hi indik lo takin ‘suong’ tiin an sie deu vong a, a poi khop el. Hieng thu hi ei hril pha thudik hril ngamtu ni nekin mi soisel hrat ni ei hlaw lem si! Delhi Verson kan buoipui hlim lai, inring naw kar naupang laia baihat ta sain a mi thruoi chang a um leiin hi ei chang tar langa hin ‘suong’ ti kan lo hmang pal ve a, sienkhom Baibul pum kan sutin “Kei ruok chun ei Lalpa Isu Krista kraws chauh naw chu uongpui ding hrim ka nei nawh” tiin kan siem indik tah a nih. “Suong” bilpui umna 2 Korinth 10,11 & 12 hai hi tiem la, ‘uongpui’ ti dinga ‘suong’ ei hmang nasatzie hmu thei i tih. Hienghai hi Delhi Version-a chu kan siem thra vong tah niin ka hriet.”
Unquote

Chu siemphuisui sin poimawzie chu a nih mi theida khom dawn chang loa ei khekpui char char hi. Korinth lekhathon ei phor lai sunga ringot khom hin thil dang inthiel fai ngai, sienkhom ei tiem liem mei mei, a’n ther fek fuk a. Chuonghai chu a remchang ang peiin ei la hung thluoi ding a nih.

(May 13, 2021 Delhi)

###