Chienga Ram Versus Buoia Ram

Ni khat laia artikul ngainuomum deu el, a chanchin ngun taka suia ka tupa Dr. Lal Dena ziek, Jerusalem chungchang thu Hmasawnna Thara hung suok kha ka tiem a, tiem a manhla el bakah, dam lai le thi hnunga mi tam tak hluo chak buoina khawpui hin ieng chen hiel am khawvel mit le ngaituona la hîpin, sietna le muongna khawpui ngirhmun a hluo pei ding ti a mi’n ngaituotir a. Isu Krista hnawltu, Muslimhai nek khoma Kristienhai ta ding chun hnam le ram tirdakum lem ni sihai hi ieng leia Krista zuitu Kristien intihai hin theida nachang hre loa ei tran bek bek el dam hi a san iem ning a ta? ti dam a mi’n ngaituotir bok a. A hnam thlang ni si, an unau danghai an pung thŭr thûr a, anni pung thei der loa an Pathienin a sukchimit pei el khom hi a san iem ning a ta? ti khom hi ngaituo lo thei lo thil niin ka hriet bok. Hnam 12 lai hnam 10 chu a nuoi bo dèr ti ei hriet a; maktaduoi 6 neka tam chu Hitler kut hmangin a thuin a thun bok. A thlangtu Jehova thil tum chu ieng am ni tang a ta? Jerusalem le thlung kop sakhuo inzirtirna hi insuo zalen a hun ta naw maw? ti dam hi ei ngaituo hlak am maw? Ei ngaituo sin ngam naw hman a hoi.

A khulang khangnaa ka hung hrilhai hi thu ka hril tum tak a ni nawh. Ka hung hril tum tak chu eini chungthu a nih. Dr. Lal Dena’n thuhmathea a hung hmang chu zawlnei Zekaria ziek bung 12:2-3 a mi, Delhi Version a nih: “2 Jerusalem chu a vela mi po po sukruitu no-ah siem ka ta, Judai ram chu inhuol an ta, Jerusalem khom inhuol an tih. 3 Chu nia ama bei dinga hnuoia hnam po po an pung khawm pha chun Jerusalem chu hnam tu khom sukchang ruol lo lungpuiah siem ka ta, a tawk chang tum taphot chu na takin mani inhliem an tih” tiin. (61 words)

BSI Hmar Version-ah ieng tin an an inlet hrim ti ka hriet nuom leiin ka zuk phet a. Dr. Thanglung inlet ang charin 2017 Version-a chun an la sie zing a: 2 “Ngai ta, a vela hnamhai po po ta dingin Jerusalem chu inthinna noah siem ka ta, chun, Juda chunga khawm, Jerusalem inhuol nia chun chuong ang chu ning a tih. 3 Chuong nia chun hieng hi hung ning a ta, hnam po po hai ta dingin Jerusalem chu lung phurriksakah siem ka ta, chuonga ama insukriktuhai po po nasataka sukhliem ning an ta; chuongchun hnuoi hmuna hnam po pohai a chunga chun inhawrkhawm an tih” tiin (74 words).

Hi version pahnihai hi i tiem zo charin ei khawvela hin ram pahnih a um ti i hriet nghal ka ring.  Ram pakhat chu tu khom hriet fie thei dinga chieng konga ei trongkam indik hmanga thu an hrilna a nih. A dang chu thu a chieng naw thei dan taka her kawia trongkam indik loa hrilna ram a nih. A hmasa hi Chienga ram a na, a nuhnung hi Buoia ram a nih. Ei ditthlangna zirin ei ngirhmun inthlak tung pei a tih. 

(June 9, 2021, Delhi)

###