Chawlolna - III

Ngaithla rop an ta, a ngaina hre si loin,
Hmu rop an ta, hmu fu si loin;
Hi chihai lungril hi a chawlol zo tah.
-Isai 6:9-10

Tuta trum chu thu le hlaa ei chawlol dan Sura favang lo en angin hang thlir thuok thuok ei tih. Thu le hla tieng hin Zo hnathlakhai lai rau raua chu Lusei trong hmanghai dottu anga inngai hiel pawl khom ei umin ka hriet a, mani le mani prawmawson inpek tieng chu ei kut a lo hlawk fu ning a tih. Sienkhom, a hnam puma ei nina le ngirhmun indik tak ei hang inbi chieng ruok chun, mengte mantuin sakeibaknei man anga a’n hril sathau ang mei mei ei ni lem a, inzakin ei kûn tlok tlok el a nih. Eini tronga ei lekhabu nei po po hi mansapuia inthawl donga pai khop chauh a la nih ti ei hriet am? A lekhabu rikna nekin a thu fùn rikna a la zang lem nawk nghala! Amiruokchu, mani inbi chieng nachang hrie mi ieng zat am ei um a?

Isu thukhawchanga a trongkam hmang inrim pawl tak chu “Hrietna dinga na nei chun hre mol raw se” ti hi a nih. Hi trongkam hi a thu hril poimawzie a uorna thila chauh ka lo bel hlak a, sienkhom chuong nek daia inril chu a lo nih. A thu ngaithlatuhai lungril kha chawlolna duorin sà taka a tuomzie le an mitin hmuin, an nain ngaithla hai sienkhom, lungril tienga mit le na varhai chauh naw chun a hril umzie an hriet thei nawzie a hmu chieng êm leiin, an nina an inhriet suok theina dingin hawihawm tak le thrahnemngai takin a hril mol mol hlak a lo nih. Lungril mit varna hmanga thil bi hlak le thu hril hlak mi ieng zat am ei um in ring a?

Eini rawi chawlol dan hang sàzie hi pangzatum tak a nih. Threnkhat chu ei pienga inthoka ei lungril theina (mental faculty) la hmang sin lo hrim hrim, a chèt khom la’n chètchangtir lo, ramsa anga ei piengvar (instinct) chauh hmanga mani hma tok toka khawsa ei la ni el thei. India hmar sak rama hriemhrei chawia invak pawl tam tak lai hin ram le hnam damna ding ngaituona leia ram rola inngai mi iemani zat um mei an ta, a tam lem ruok hi chu silai thilthawtheina suonga mani piengvar chauh hmanga inlekphek nuom pawl an ni lem ring a um. Ramsa le chuonghai indanglamna chu, ramsahai chun an tin le ha hmangin an hringna hung chotu lakah an lo inhum a, an buzawla an poi va tawk naw lem chun ei poi an tawk ngai nawh. A danghai ruok hin chu hriemhrei trium hmangin an mihriempuihai chu zalenna thu tiemin an nèksawr a, an thisen an dawk kuong kuong thung a nih. An dawk rawn po leh indawk har nek hmanin an chawlol deu deu niin a’n lang. Thisen inruiin khop tik an nei ngai si nawh.

Chuong ang bokin chawlolin a chawlolna a hriet el thei nawh. Chawlol inhriet suokna ding chun lungril hmang nachang hriet a ngai. Naupa tlan hmang khomin a ngaituona ril a hmang charin a chawlolzie a hung hmu suok a, inlamlet nachang a hriet chauh a ni kha. Ieng leia ei nauhai hi sum tam tak sênga sikula ei inkaitir am a na? Annia inphûm, an theina (faculty) nasa tak chu a tam thei ang tak kei suok a, hmang tlak ni dinga damtea buotsai a, an theina sukpung pei dan ding lampui kawkhmu a, mani inenkol thei ding le ram le hnam ta dinga hmangruo trangkai ni dinga ser suok nih. A tawi zawnga hril chun, an lungrila ei tu nuom tak chu ‘nachang hrietna’ a nih. Miin a lungril hmang nachang a hriet phá pha leh a taksa le thlarau khom thil thra thaw dingin a’n chèttir thei chauh hlak a nih.

‘Nachang hriet’ theina dinga hmangruo trangkai tak chu lekhabu thra tiem rawn le inchuk ngun niin ka hriet. Chu ding chun eini trong chaua lekha tiem theihai ta dingin lekhabu thra le chanchinbu thra ei hau a ngai. Iem a na ei ngirhmun tak? Ei nina tak hi eini hriet dinga hang phor lang khom inphalam le inzakum khop a nih. Eini tronga lekhabua chauh innghat ei ni chun, chawlol khom chawlol phak ding ei lo ni naw hrim hrim niin a’n lang. Pawl 12 chen vernakiular sabzek nei thei dinga phalna an mi lo pek dam hi a mi petuhai hin ei chawlolzie an hriet naw lei mei mei ning a tih. Kei khom M.A ka zo hnung le IAS/IFS ka tling hnungin ka chawlolzie ka hung hriet suok tak tak chauh leiin, mihai titi zawm theina ding bek tiin ka sakzek thaw ngai lo thlur hrang hranghai chu a bula inthokin ka’n chuk tran nawk ngat ngat a, tu chen hin chu chu ka la thaw zing a nih. Hrietna phek ei phok rawn po leh ei chawlol dan sàzie ei hriet suok thei chauh a nih.

Secular literature

Kum sawmnga chuong liem taa Pherzawl tlanga sikul ka kai ve lai chun pawl inhnuoi tieng hmang dinga siem Zirtirbu, Sierkop bu, Leihnuoi Ram (Geography) le High School kai phak chin hmang dinga Dr. Thanglung siem English-Hmar Dictionary ti bak Hmar tronga lekhabu um ka hriet ve sun chu sakhaw tieng lekhabu, Dr. Thanglung buotsai bok, kum 1946-a sut Thuthlung Thar bu le 1923-a sut tran, a hnunga Independent Kohran Hlabu tia an hung ko chauh a nih. Lekhabu dang um ve sun chu Lusei trong vong a nih. Kei ngei khomin lekha tiem ka hung inchuk tran laia ka Baibul tiem hlak chu Lusei tronga mi a la nih.

Hi hnunga sakhuo tieng lekhabu ni lo, sikul sakzek dinga buotsai ni bok lo, tlangkhuo (secular) lekhabu hung suok nawk hmasa tak chu kum 1958-a sut Hranglien Songate ziek Hmar History kha a ni ka ring. Hieng lai hun vek hin Primary Level-a inchuk ding, pipu tienami thlang khawm, Pherzawl Readers 1 (1958) le Pherzawl Readers 2 (1961) chu H.Thanglorin siem bok a. Hienghai hi lekhabute, minit sawmthum vela tiem suok thei vong a nih. Chu dottu chu ka lekhabu buotsai, phek 300-a sa, 1980-a kan tlangzar Hmar Hla Suina kha a ni nawk el thei. Hla tieng chu kum 1962-a kan buotsai, solfa thrang Thralai Hlabu dam, H.V.Vara buotsai Hmar Hla Hlui (1979) dam, Lenruol Hlabu (1979) dam, L.Chongtho Hmar buotsai Hmarhai Trobul Hlabu Pakhatna (1987) dam, B.K.Rose buotsai Tinrem Hla Bu (1991) dam a hung suok bok a.

Cultural History tieng chu Louis L. Keivom buotsai Hmar Pi le Pu Dan (1982) le Hmar Tolung (1990) le H.V.Vara buotsai Hmar Hla phuoktuhai (1989) le Hmar Nunphung (2000) le Rengkaia innghat Sinlung Publications haiin lekhabu iemani zat an suthai kha an ni nawk el. Lekhabua tiem tlak suok hnuhnung tak ka hriet chu Zaneisang thusep ziek thlang khawm Sinlung (2004) ti kha a nih.

Church History tieng chu Rev. Darsanglien Ruolngul buotsai Chanchin Thra Kalchawi (1982) le a hnunga pawl tukvera inthoka tranghma kei taka Rev. Lalthankhum Sinate buotsai Kohran Hring (2001) le chu khêng letna ni awm taka inlang, Rev. Darsanglien Ruolngul buotsai Chanchin Thra Kalchawi- II (2003) hai an nih. Ei kohranhai le thruoituhai tirdakumzie hre nuomtu chun hieng lekhabu pahnihai hi lungril inhong taka tiem ngei chi niin ka hriet. Tiem hnung khoma mit varna la nei lohai chu Pathienin chawlolna thlarau a pek, hre thei lo le hmu thei lo hrim hrim dinga a ruot khom ei ni el thei. Ei kohran thruoituhai le an thruoihruoihai hi pawl tranna lungrila Setanin an mit a sukdel le an na a sukset tlat an ni leiin, Pentecost thlipui dawbola nuoi naw chun har suok mei mei chi niin an inlang nawh. Hi thu ziek khom hi mani inen fiena lungril put phànaa hmang nekin lungsenin ha rawt mei an tih. Chu chu a nih chawlol dawbola chawlol chu.

Pêng hla loin, ei thu buon laia bok lut nawk inla. Ei pi le puhaiin tienami ngainuomum le var tak tak an mi lo maksanpek bak kha ei sunzom tlawm hle a. H.V.Vara’n Kotsuo Lungdaw a ziek kha tienami tawi suok hmasa pawl a ni ka ring a. Pawlsawm ka thaw lai, kum 1957-58 a ka ziek Sangi le Thangsiem hlak chu a kawpi an mi sukhmangpek a. Ka hriet suok thei po drama anga ziekin October 1962 HSA General Assembly, Sielmatah a lem kan inchang a, chu chu a tawpna a nih. Chu hnung chun short stories dorzon khat neka tam le Novel pahni ka ziek ta a, a thren insuo a ni ta a, a thren ruok chu insuo loa la um zing a nih. Eini lai hieng tienga thaw hlawk êm êm chu D.M.College-a ka lekha inchukpui, ka ruolpa S.N.Ngurte a nih. Ama hi MAL sabzek ding buoipuinaa lukhaitu tak le thaw hlawk tak a ni bok. Novel puitling, hnam changkanghai thaw dan standata buotsai le insuo chu Lal Remsiem ziek Hmangaina Chul lo (2001) chauh a la nih. Ieng khom ni sien, ei lekhabu nei ta po po hi, mi tlawmngai chungchuong F.T.Hminga lekhabu siem le sut po po khom thrang sain, mansapui pakhata inthêp donga pai khop chauh a la nih. Chuleiin, ei chawlol ei ti hi indik tak ei lekhabu neihaia innghat ei ni chun chawlol phak ding khom ei lo ni nawh.

Trûl tongkhongin a mi norna leiin, varnakiular sabzeka hmang ding Nunro Bu le lekhabu dang dang chu Hmar Literature Society huoihotna hnuoiah mi tlawmngaihaiin an thu ziek thaw khawmin bu iemani zat a hung suok a, hi hi thil lawmum tak a nih. Hieng ei lekha ziekhai hin duthu la sam zo naw sien khom eini ngirhmunin a phak tawk anga ei phu suok thei ve sun a la ni leiin a hlawk thei ang taka hmang trangkai phot tum ei ta, a la hung phuisui pei nghakhla takin beisei bok ei tiu. Hieng ei thu ziek haia inthok hin thu le hlaa ei phak chin bakah ziektu tam tak chu sakhuo inzirtirna rip sunga intang tlat ei nizie chieng êm êmin hmu thei a nih. Ei thu ziek threnkhat lem chu sande sikula inchuk dinga ziek khom a hoi hiel. Sir tina inthoka hringnun thlirna huoisen taka ei ziek ding a ni chun zalenna boruok ei mamaw a, secular literature inthranglienna ding lem chun chu boruok chu ei mamaw zuol a nih.

Religious literature
Ei lekhabu nei tam lem chu sakhuo tieng lekhabu a ni a, a thlungpui chu Baibul a nih. Lusei tronga inthoka Dr. Thanglung inlet Thuthlung Thar chu 1946-a sut a ni thu ei hril tah a. Harsatna hrang hrang leiin ama buotsai bok Holy Bible ruok chu kum 1968 khan sut a ni chauh a nih. Hi Baibul tho hi kawpi le a thren siem thra met metin Dr. Rochunga Pudaite khomin 1980 khan a hung sut ve a. Hieng Baibul pahnihai hi Lusei tronga inthoka a ngiel a ngana an inlet sawng a ni leiin Lusei tronga mi an thaw suol leh an thaw suol ve a, an ngir leh an ngir a, an inthrung leh an inthrung a, an zal leh an zal ve pei a, an thaw indik khom lunginruol taka inlet suol tam tak an nei bok. Khawvela Baibul a hrana inleta inhril sihai lai chu Dr. Thanglung le Dr. Rochunga Pudaite anga inthuruol hi an um thei ka ring nawh. Lusei tronga inlettuhaiin King James Version (KJV) thluka Lusei trong an her kawi le chokchawrawi angin, anni khom hin Lusei trong thlukin Hmar trong an mi hem kawipek a, ei chi-ai zo an ta hi.

Ei chi-aina le chawlolna bul hre thiem ding chun hi lai thu hi hang hril sei met ngai a tih. Pathien thu sunhang khat khom bo lo dinga inzirtirna chu changchawiin, Lusei tronga Baibul inlettu Sap misawnarihai khan a thu umzie le kawk anga Lusei trong fe dan hmanga fie taka inlet loin, a ngiel a ngana thu mal tin inlet (literal translation) kha an lo tum leiin, lo thei loa KJV thluka Lusei trong fe dan khom an inthluktir a hung ngai a. Chieng deua zuk hril el thei kha a chieng naw thei patawpin an lo inlet a. A chieng nawna lai lai kha a Pathien thu inthùkna le inrilna, a râu rieuna ni dinga an lo intù nghet leiin, chu chu a indik le indik naw thlu loin eini chenin ei lo pom det bur a. Chu ngaituona chun bawiah a mi siem leiin, Baibul an lo inlet ta sa hang sukdanglam kha Pathien thu thlak danglam anga ngaina lungril ei put tlat a, an inlet suolhai kha a kawi a ngilin ei zawm el niin a’n lang.

Entirna tlawmte hmangin chu ngirhmun chu hang hril ei tih. Kum li liem taa Delhi Hmar Christian Fellowship (DHCF) sande sikul-a kan inchuk chu Chanchin Thra Johan a nih. Bung khatna kan thaw truma mi thruoitu chu Rev (Dr) Jacob Pudaite a ni a. Ama le a nuhmei Zingi hi kum tam Dr. Rochunga Pudaite buotsai Hmar Bible buoipuitui an ni leiin bung 1:4 kan tlung chun a Millenium Edition chawiah “Amaa chun hringna a um a; chu hringna chu mihriemhai varna a nih” tiin a lo la inziek zing a. Kei chun, “Jacob, hi changa ‘mihriemhai varna’ (wisdom of men) tia an inlet hi ‘mihriemhai var’ (light of men) ti ding a ni lem a, hung thlak ta êm êm ro ie, inzak a um a nih” ka ta. An sut nawk khan chu an hung thlak ta trawk a nih.

Hi hi ei chololzie hrilfiena dinga entirna thra tak niin ka ngai. Saptronga Baibul tiem thei le a umzie hrie a dorzona ei intung khep khup hnung le ei mi thiem intihaiin hrilfiena bu hiel khom voi iemani zat an siem hnung khoma inlet dik lo a nizie ei hmu suok thei der naw kha ei lungril chawlolzie le inthimzie sukchiengtu a nih. Ieng leia Saptrong thu mal ‘light’ ti chu ‘varna’ tia ei inlet tlat am a na? A san chu Lusei trongin ‘ênna’ tiin an lo inlet a, chu chu Dr. Thanglungin ‘varna’ tina amanih a sawn a, Dr. Rochunga Pudaite khomin a hung sawn ve pei a, ei Baibul hmangtu po po khomin ei hung sawn ta seng a, khel ei hril ruol mur mur el a nih. Saptronga ‘light’ chu Hmar trongin ‘var’ a na, ‘varna’ chu Saptrong chun ‘wisdom’ a nih.

Ei chawlolzie tar langtu pakhat nawk chu ‘thil suol thaw’ ti le ‘thil thaw suol, thil suksuol’ ti indanglamna ei hriet hrang thei tlat naw hi a nih. Baibula thu chabipui pakhat chu ‘thil suol thaw’ ti hi a nih. ‘Thil suol thaw’ umzie chu danin thaw lo dinga a ti thaw, dan bawsiet a nih. Chu chu Saptrong chun ‘committing sin’ ti a nih. Sie le thra hrietna thei fa lo dinga Pathien dan le thupek chu Adam le Evi-in an bawsiet a, an fak a, chuleiin thil suol an thaw a nih; thil an suksuol amanih thaw suol amanih ni loin ban bawsiein thil suol an thaw a nih.

‘Thil suksuol/ thaw suol’ ruok chu Saptronga ‘committing mistake or blunder’ tina a na, dan bawsietna a ni nawh. Tui ka dawn a, ka lem suol a, ka’n hàk a, sienkhom thil suol ka thaw a ni naw a, ka thaw suol amanih lem suol a ni lem. Lekhathon ka ziek a, thu mal spelling ka ziek suol amanih ka ziek hmai thei a, chu chu ka thaw suol a na, thil suol ka thaw nawh. Lam ka lawn laiin ka’n sui thluk a, chu chu ka thaw suol a na, suol ka thaw a ni nawh. Amiruokchu, danin lampuia insui thluk khap sien chu, dan ka bawsiet ning a ta, thil suol ka thaw ning a tih. Ei Baibul hmang hlak pahnihaia hin hang en la, thil suol thaw ‘committing sin’ hi thil suksuol (committing mistakes/blunder) tiin an mi siepek vong a nih. Hi hi pangzatum deu a nih. Pathien thu a ni naw zawnga hrilna a ni leiin Setan hmangruo trium a na, ei thaw indik nawzie hmu thei loa ei um chun a hnam puma inngaisietna tham a nih.

Hi thu hi Churachandpur-a 2003/2004 a kan inzin trumin pastor le kohran thruoitu iemani zat hril fie ngiel ka tum a, voi hni voi thum kong hrang hranga a danglamna ka hril hnungin hre angin an um a, sienkhom a tam lem chun an hriet chieng tak tak naw niin ka hriet. A nawkah an hril dan pangngai thoin an hril nawk a, an thaw indik nawh ti ngaituo zuina khom an nei chuong naw a, an chawlolzie an hriet tlat naw leiin. A san tak chu, hi thil hi an ngaituonaah a lut ngai hrim hrim naw lei a nih. Chuong ang tluka a danglamna hriet harsa an ti chu ‘tísa’ ti le ‘taksa’ ti hi a nih. ‘Taksa’ chu mihriem ruongam le pumruoa bung hrang hrang inbel khawm, mita hmu thei le kuta them thei a nih. “A taksa a thra” ei ti hlak a, “A tísa a thra” ei ti ngai nawh.

‘Tísa’ chu mihriema inphùm, khawvel thil, thlarau lo, mihriema châkna chi tinreng le a bebawmhai, suol thil, thlarau thil le inkal, kuta them thei lo a nih. Tísa mi chu khawvel mi, thlarau mi ni lo tina a nih. Tísa mi chun thlarau thil a ngaituo ngai naw lei le a do tlat leiin Pathien a suklawm thei nawh. Taksa khawsakna ding ringot invoitu chu thlarau mi ni loin tisa mi a nih. Mihriem taksa sunga hin tísa thil le thlarau thil an cheng a, a thu nei lem lem zie chu mihriemah a’n lang suok hlak a nih. Chuleiin, Lusei tronga an lo thaw leia ‘THU chu tísain a hung inchang a’ tia ei inlet ve hi Pathien thu kal a na, thu chu tísaah inchang tak tak chu ni sien, Pathien theida zawng tak ning a ta, tukhom sandam ni naw ni hai. THU chu mihriem taksa putin a hung inlang a, mihriemhai lai a hung cheng a ni lem. Chuleiin, “Thu chu tísain a hung inchang a” ei ti zat hin Pathien poi ei tawk a nih. Chu khom chu hre thei lo dinga chawlolna lungril mi petu thlarau chu Pathiena inthoka suok ni kher naw nih.

Kan tleirawl laia Hmar trong inchukna dinga lekhabu enton ding thra taka an mi kawkhmu hlak chu Baibul a nih. Amiruokchu ka hung puitling hnung chun, Hmar trong inchukna dinga thra naw tak chu ei trong kalhmang chokchawrawitu chu ei Baibul hi a nih ti ka hung hmu suok a. Active voice neka Passive voice zawnga thu hril ei tum tlat khom hi KJV thleka ei trong kalhmang ei lo sukkhawlo lei a nih. Chu chu thu indik a nizie pom ta nekin, ei Baibul trong awphawia thu ei hril le ziek naw chun Hmar trong indik lo hmang angah ei inngai nuom hiel el an tah. Hmar trong indik lo ei ching tharhai po po hi kohranin a ching suok deu vong a nih.

Chuleiin, Hmar trong thi mek le chu ruola ei thuring ei chokchawrawi khom hi ei hnamin a dampui le a hringpui ei dit chun hi ei inawkna chang triuma inthoka ei san suok hmasa phot a trul makmaw a nih. Hi thudik hi hmu thei lo le man fu thei loa ei sungril mit a’n del zing a, hre thei lo dinga ei na a set zing tlat chun ei chawlolna chu ei hnamin a thipui ding a ni hrim a nih; tukhom intum nawng ei tiu. Chu lei chun a nih, February 2002 a TRONG VUINA DAR RI CHU NGAI RO ti artikul Delhi Thurawna ding ka ziek hiel kha! Hrietna dinga na nei chun ngaithla ngun raw se. Ei trong hin hma sawna hring pei dinga ei dit chun a hmang dan le ziek dan kalhmang thra lem lak lut a, ei siem phuisui pei a trul makmaw. Chu siem thrat mawphurna chu a hmangtuhai kut lieu lieua innghat a nih. Pherzawl tlanga motor khom kan la hmu phak hma, pawl sari pawl riet ka’n chuk laia ei trong ziek dan thra lem lampui lungrila invoia keima tawk tawka ka lo dap ve hlakhai chu tuta a tak ngeia a thren a zar ka hung hmanghai hi an ni a. Hmar trong rurel (structure) hi ei bi inthuk deu deu chun, Zo hnathlakhai trong po po laia scientific naw tak a nina chin a um a. Chu chu siem phuisui thei a na, chu ding chun formal structure le informal structure ei nei a ngai. Sienkhom, chuong thu chu ngaituo ta nek hmanin, mi thiema ei ngaihai chen khom aw, o le tr hmang dan levela la buoi mei mei ei ni a hoi a, hi hi thil vangduoi thlak tak a nih. Hi ka thil hril hi kum tam tak hnungah ei la hung hriet thiem el thei a, chu pha chun kei le tuta ka thu ziek tiemtuhai hi um ta nawng ei ta, ei trong khom hi san tlak um ta kher naw nih. San thei a la ni lai hin san suok ei tiu. MIL ei nei hin mi san naw nih. Ei chawlolna ra fatu ding chu ei ni ngei hi ei nih. Vangneithlak takin, kristien ei hung ni hlima inthok tah khan thlaraua mi hrat khawkheng Pastor Thangngur le a aihna phapuihaiin tu la sukdal lo, Hmar trong indik hmangin hla ropui tak tak an lo phuok a, ei trong mawi tak tak, thamral el thei ding chu hla zêngpuiah an mi lo hlù lutpek a, chu ra chu tu chen khom hin ei la tlàn ngat ngat a nih. Ei literechar hnarpui, thu le hlaa a hnung peia châk ei lakna tak chu Independent Kohran Hlabu hi a na, chu taka a pukhawi chu Pastor Thangngur a nih. Ei hla thu hmanghaiin dal tieng pan deu deu sien khom, hla tieng ringota chu mani ei intodel tung pei chauh khom ni loin, ei kawl le kienga cheng Zo hnathlakhai chaklakna le malsawmna hnar ei ni zui pei niin a’n lang.

Thu ziek tienga ruok chu a ni teu nawh. Ei lekhabu hauna tak chu sakhuona tieng kawk a nih. Amiruokchu, mi ziek sa inphuoi deua ei inlet ti naw eini awm thu suok ngat lekhabu a um ei hriet am? Van ko thla thei hiel khopa thu hril thiem khom ei um tawl a, sienkhom a hlun lem le trangkai lema rong ei bawl theina dinga ei sermon-hai lekhabua buotsai pei ruok chu ei um nawh. Kohran hrang hrangin thla kipa chanchinbu ei insuoa sermon-hai hi hang tiem inla, fak tling a vang a, a fahra ngawi ngawi a, hrietna mautam trampui tuor zing ei nih ti inhmai ruol a ni nawh. Sakhuo tieng thila eini kutsuok, literechar tling thei lekhabu ka hmu ve sun chu Dr. Rochunga Pudaite buotsai Tlângchâr Tuihnàr (1960?) le Lawmna Thurûk (2003) deu chauh la niin ka hriet. Ei hril sei po leh ei mong ei hlìm insâng ting el ding a ni leiin, tawp zai la rel lem phot ei tih

(Delhi, June 7, 2006)