Search


Aug 12, 2017

Lengkhawm Hla


Hnam tinin a hun le hmuna sak chi hla an nei. A thren chu a saka sak chi, thluk tum tum nei a nih. Sak chi lai khom hlapawl chaua rem chi a um. Halelujah Chorus chu a pawl kima rem chi a ni leiin a êr (soprano) ringot sak chun umzie a phur tlawm. A thren ruok chu a sama insam chi, insam dan thluk bik rieu nei dam a nih. Insam chi ‘Ghazal’ dam hi Persian le Arabic tronga phuok a ni chun dannaranin chang (couplet) 18 nei, a tlar hmasa tak pahnih tawpa ri (rhyme) le a hnung zuitu tlara nambar kop kim (even number) pei lamrik ri kha a khuongruol ding a nih. Chu chu Saptronga ‘rhyming’ an ti hih a nih. Entirnan, ka hla phuok ‘Kan tlangram mawi’ le ‘Zo tlang sangah’ tihai hih internal rhyme le external rhyme nei kop ve ve an ni leiin, sak loa thumal pali pei lam kopa insam khomin hla a tling ve hrim hrim. Dawi Hla ei ti khom hi hla anga ei hlu lut san chu hlasam zierang a put lei a nih.

Aug 9, 2017

Histawri Le Hla Inkungkeina


History is a cyclic poem written
by time upon the memories of man.
- P.B. Shelley

January 31, 1981 khan kum tam tak sunga ka buotsai HMAR HLA SUINA (phek 322-a sei) chu Sielmat Christian High School Hall-ah khang laia Agriculture Minister Ngurdinglienin a tlangzar a. Hi ni tluka Tuithraphai sunga cheng Hmar hnathlak laia thu le hla tienga mi challang, ram le hnam le khawtlang thruoitu, bulthrut remtu le ban poimaw, mi hlun le khaw tin lal le khawnbawl le sakhaw thruoitu luhai a ruola an fe khawm rawnna hi ka la tong ngai nawh. ‘Hmar History’ ziektu hmasa tak Hranglien Songate khomin a mi hung hmangpui a, thuhrilna chanvo pek a ni nghe nghe. Kum 1928-29 laia naupang inchuk ding BU HMASA (HMAR PRIMARY) siemtu le kum 1926-a ‘En tu’m mihrang pasalthrahai’ ti hla ropui phuoktu H.L. Sela khom kum 77 mi ni tah sien khom ngai poimawin Old Churachandpur (Suongpi) a inthokin a nuhmei leh funghrol thruna kea hung ngat ngatin an mi hung uop a nih.

Aug 5, 2017

Thengreng Dawr (Space Shopping Mall)


Khawvel hmasawnna a lawna a lawn dĕm dêm lai kha a tlănin a hung tlăn a, iemani chena inthoka computer age-ah ei lut khan a vuongin a vuong tah thung leiin, intlonpui tum chun thuok hang lakna hman khom a um ta naw tluk a ni deu tak. Dier kei sing a, tlanbahrika hnot zing naw chun, thla khat sung ringot khoma ‘Rip Van Winkle’ dawbola inchang theina khawvela leng ei nih. Insuk-gospel deua ‘Hun tawp a hnai takzie hriltu a nih’ ti thlak zena van tieng nghaa ek che inthrung thaw ringot tumhai ta dingin ei khawvel hi dam khawsuokna ruol a ni ta nawh. Mi nauhaiin van thengrengah dawr ropui tak tak indinin, boruok zai hmangin inbiek pawna hrui an thlung fek fuk a, man chawia ei lo hmang theina dingin biekbawm ei lo chawi fir fer a, intitheinaa ngai pawl khom ei bo nawh. Insuktheinaa hmanga ei biekbawm chawi ei hmet le tlai zata hmang man po po intêltu chu mi dang, thluok hmang hlawk thiem le hausa tontawhai an nih.

Jul 29, 2017

Hmar Customary Laws & Practices


Hnam dang dan thrahai la veng ei tiu,
An dan suol thîk loin.

- Lalkhum Keivom

Rural Women Upliftment Society (RWUS) le Women in Governance (WinG) huoihotin Hmar Customary Practices hriltlangna, anni trongkama, ‘interface meeting’ an ti chuh July 27, 2017 khan RWUS Training Hall, Churachandpur-ah an hmang a. Sinlung Academy of Letters (SAL) aiawa thrang dinga palai pahni hung tir dinga fielna, SAL Secretary kuoma e-mail a an thon chu a hung tlung charin telefawn-in a mi hung hril bakah hi chungchanga SAL ngaidan tlangpui hung ziek dingin a mi ngen a. A ‘Concept Paper’ khom hmu loa ziek el thei a ni naw thu le chu chu mi hung thon dingin ka hril a. A hung tlung chun a tuk ela inkhawm ding an ni tah leiin hmawsarumin, tawi te, bong rem rumin ka buotsai a, zan re hnungah ka thon hman chauh a. Chu lekha chu a hnuoia hin inchuong a nih.

Jul 15, 2017

Hnam Ro Humhal - 2


Pipu tienami le Pathien thu thlung kopa Hmar tronga sakhaw hla phuok hmasa tak chu Pastor Thangngur a ni el thei. Pathien hmangaina thu hrilna dingin thiem takin tienami a hmang a. A tienami hming phurtu le a chanchin hril si loin, a saktu taphotin pipu tienami tekhia a hmang a nih ti chieng taka hriet thei ding siin,

Jul 8, 2017

Hnam Ro Humhal


Ka piengcham July 15, 2017-a tlangzar hman tuma hmawsaruma kan buotsai mup mup, lekhabu puitling dinga ka thuziek 40 kan khawrpum, thu mal nuoi khat le sing nga chuong le phek 300 chuong chu sun-zan zoma Blessing Buhril leh editing le proof-reading kan thaw ngat ngat hnungin sut dingin ka Printer le Designer Mani Rai kutah kan pek suok a. A ni le hun ka hang en chun Zirtawpni zan a lo ni hman der tah a. Pathienni zata suok Delhi Thurawn (DT)-a ding artikul tharlâm ka la ziek hman naw bakah Shillong le Guwahati tienga unauhai souvenir buotsaia thrang ding thu bituk an mi pek chu July thla sung ngeia thon ta ding a ni thu ka time-table ka zuk phet chun a lo inziek kuou a. Bat an tieng el a nih.

Jul 1, 2017

Chanchinbu Poimawzie


June 29, 2017 suok Hmasawnna Thar (HT) a chun ‘Inhriettirna’ hieng hin a chuong a, inzak a umin ngaituo a suksei ngei!

Quote
“New Lambulane, Imphal Area sunga Hmasawnna Thar man chu kum khat lai zet pek a ni ta naw leiin tuta thla Chanchinbu man bata um hi hung pek a ninaw chun thla thar July, 2017 a inthawk chun New Lambulane Area a Hmasawnna Thar hung thawn zawm a ni tanaw ding a nih ti kan hung inhriettir cheu.

“Chanchinbu insuona lekhapuon man, a sut man le hmangruo dang dang man hai a to pei leiin a thlawnin kan hung thawn zawm thei ta nawna ding thuah hin lo hrethiem seng dingin ka hung ngen cheu.

 Hmarbiel le Churachandpur biel sunga Chanchinbu man pe tha lo hai khawmin bat lo pe diet diet seng dingin ka hung ngen bawk cheu. Thla ¾ bat hai chu pekzawm in lo ni tanaw khawmin sawisel thei ninaw nih.

Sd/- Editor & Publisher,
Hmasawnna Thar Daily”

Jun 24, 2017

Views From My Window: Thlirna


Ka piengcham July 15, 2017-a tlangzar hman ngei dinga ka thuziek thlang khawm bu khatna buotsai dinga thutlukna ka siem thut leiin ka artikul hluihai dap khawm le rem khawmin ka buoi char char a, ka hriet naw karin Inrinni tukin a mi lo nang dĕr tah a. DT-a insuo ding artikul ziek chu hril lo, ziek ding thupui khom ka la ngaituo hman naw leiin tuta kar chu inphat el ka tum a. Ka hang ngaituo non leh, dam zing sia tum hlen lo chuh a pa naw thlakin ka hriet si a. “Takchapa!” tiin ka hang insang mar a, zing nisa suok ruolin ka computer hmaah ka thrung a, ka lekhabu insuo tum chanchin hung phor met ka tum a nih.

Jun 16, 2017

Lalnunnem Thlirna


A hope beyond the shadow of a dream.
-John Keats (Endymion)

June 16, 1974 khan Delhi tlangah thumal 8360-a sei tienami, ‘LALNUNNEM KA NGAI EM CHE’ ti ka ziek a. A hming hi a sei duot bakah, hi thupui bok hmanga ka ruolpa Darkamlo Faiheng hla phuok, sak hlaw tak el leh miin an ngai pol hlak leiin, Mizo (Lusei) tronga kan inlet hnungin thu le hlaa ka ai hna phapui (fam tah 1992) Prof. Siamkima Khawlhring-in William Shakespeare thaw dan hmanga hming tawi te inputtir thra lema a ngai chu pompuiin, ka tienami ziek panga le thusep ziek pathum thlang khawm chuongna lekhabu ‘Nun Ram’ ti 2001-a kan sut chun ‘Lalnunnem’ tiin kan hung sie tah lem a nih.

Jun 10, 2017

Thiemthainu


Sing, Heavenly Muse, that on the secret top
Of Oreb, or of Sinai, didst inspire
That shephered, who first taught th chosen seed
…I thence
Invoke they aid to my adventurous song.
- John Milton (Paradise Lost)

Thiemthainu ei hril ding hi phaivang chanchin a ni nawh. Grikhai thusima an Pathien Zeus (Latin Romans Jupiter)-in zan kuo a zawna hmel thra chungchuong Mnemosyne a riekpuia inthoka naunu pakuo hung pieng- Clio, Euterpe, Thalia, Melpomenia, Terpsichore, Erato, Polymnia, Ourania & Calliope- hai chanchin a nih. An renga hming tlanglawn an inputtir chu Olympian gods hming Mousa, Mousai (Mu-se) ti-a Grik tronga an ziek, Latin tronga Musa, Musae tia an ziek chu a nih. An hung pieng hin Grik pathien pakhat Apollo le a thaikem Nymph Eufime enkol dingin Mnemosyne chun a pek suok a. Apollo inchuktirna hnuoiah hung seilienin, theina le thiemna chi hrang hrang, a khawm hrilna hminga ‘Arts’ ei ti, tu lai hnai ela Delhi tlanga khawsa Hmar Students’ Association thruoituhaiin ‘Thiemfin’ ti-a an inbuk chu koltu an hung ni a. Kha hmaa ka lekha ziek threnkhatah hieng Muse-hai hming tlanglawna hin ‘Thiemthainu’ ti ka hmang a, chu chu ka hung hmang zui pei a nih.